Control
Hai tempo que ando buscando un documento importante, deses que se gardan ben gardados para que non se perdan, pero que cando cómpren no aparecen. E durante a busca veume á cabeza o útil que é ter unha boa memoria, na que se vai gardando o importante para poder recuperalo no momento preciso. Cando gardei aquel documento, impreso en papel, no se me ocorreu escanealo e gardar copia na memoria do meu ordenador, de maneira que agora, como son moi ordenada no meu desorde, nin teño o papel, nin teño a copia. E aí é onde perdo o control e por moito que lle dou á tecla, nin aparece o que ten que aparecer, nin desaparece o que xa non é preciso máis ca para ocupar espazo.
Isto lévame á situación real na que se atopa a sociedade: non atopan os papeis quen debían telos custodiados para usalos cando se precisan melloras, de maneira que, quen nos goberna, perdeu o control ata o extremo de ter que empregar a forza para acalar as voces que reclaman un cambio de rumbo nas institucións políticas, económicas, sanitarias, xudiciais e educativas.
Alguén me mandou fotos de Barcelona, da carga policial. Vin imaxes nos noticiarios de televisión e na prensa. E quedei abraiada.
Na actualidade en todos os centros educativos ten que haber unha comisión de convivencia, a finalidade da cal é resolver conflitos de maneira pacífica cando se producen. Será que nos gobernos autonómicos e nacional non saben o que é iso? Ata ese punto perderon o control os gobernos? Ou é que tampouco atopan os documentos importantes, nos que se redactaron normas para a convivencia e resolución pacífica de conflitos?
Igual teñen que volver á escola para saber como funciona unha comisión de convivencia. E que nos collan confesadas ás persoas que exercemos a docencia.





